Буниңдин төрт жил илгири Санаәтчиләр, тижарәтчиләр вә йеза егилиги хадимлири жумһурийәтлик уйғур ассоциациясиниң тәшәббуси билән «Қазақстан Уйғур меценатлири клуби» қурулуп, униң әзалири тәрипидин «Илһам» мукапити тәсис қилинғанда, бу башланминиң кәләчигигә гуман билән қариғанларму болған еди. Чүнки уни уюштуруш вә өткүзүш ишлири билән алтун ялитилған статуэтка һәм дипломларни яситишқа сәрип қилинидиған пулни һесаплимиғанда, «Илим-пән вә маарип», «Әдәбият вә публицистика», «Тәсвирий сәнъәт», «Театр» һәм «Музыка» кәби бәш номинация бойичә берилидиған мукапат фондиниң өзила 3,5 миллион тәңгигә тәң болған мундақ чарә-тәдбирниң һәр жили өткүзүлүшигә ишиниш һәқиқәтәнму тәс еди. Лекин мундақ алийжанап ишни қолға алған оғланлар пәқәт уни давамлаштурупла қалмастин, жил өткәнсири номинацияләр санини көпәйтип (өткән жили «Илим-пән вә маарип» номинациясини айрим икки номинациягә айландуруш һәм «Спорт» номинациясини қошуш арқилиқ дәсләпки жили бәш болған номинацияләр санини йәттигә йәткүзгән болса, бийил униңға «Течлик, милләтләр ара разимәнлик вә Қазақстанниң гүллиниши үчүн» дәп атилидиған йәнә бир номинация қошулди), «Илһамни» барчә хәлиқ тәрипидин етирап қилинған мукапатқа айландурди. Биз бунинға йеқинда Уйғур театриниң бенасида болуп өткән новәттики «Илһам» мукапитини типшуруш мәрасимида йәнә бир қетим көз йәткүздүқ.
СКАЧАТЬ Вручение премии Ильхам творческой интеллигенции, газета «Уйгур авази», февраль, 2005 год.PDF